Cantzoni contras a sa speculatzioni energètica

In s’annu de gràtzia duamilla-bintunu
Dusu funtzionàrius benint de foras
Cun una valigia, in manu a cadeunu
Pren’e tzerachia, a sa traitora
Totu alliputzius, de Terna tribuna
Quaterna e cinquina, fendi sa fortuna
Cun sa faci allirga, de su bincidori
Prangit su messàju cun su mucadori

Foras de Sardigna, baidindi a tesu
Baidindi a foras e no torris prus
Curri prus chi podis, nou piemontesu
Circa de furai conca prus a sus
Conca prus a sus, circ’e ti nd’andai
Prus no pongas pei, de Sardigna bai
Cun sa vana bòria de su pillantzosu
Circatì tzeracus, nd’ant a tenni gosu

Sètzius in sa mesa, cun su tzeracheddu
T’at a cumandai, sètziu prus in artu
Chistiona e promiti, frassu su fueddu
Dd’ant totu bèndiu su fertili sartu
Sindigu in genugu, ascurtendi missa
S’ant comporau cun cussa promissa
Po unu padenti de trinta opinus
No est prus terra bona, po àxina ‘e binu

Davide a solu, de brillanti menti
Contras a Golia, artu che giganti
Sighit sa batalla, de sa sarda genti
Nci dd’eus a bogai, a foras s’ocupanti.
Po furai su bentu fata a energia
Furant su soli, po s’economia
Sa transitzioni de s’italia intera
Depeus pagai nosu, a cudda manera.

Circat de si oponni, su pòpulu sardu
In un’assemblea sa popolatzioni
Terr’e Campidanu, in log’e su Pardu
De is bingiaderis, sa contestatzioni
Malu pagadori, funtzionàriu ingordu
Mindula cun trigu sceti s’arregordu
Imoi no preni, de pani su forru
Nci ddus eus bogaus, in pari a son’e corru